Ginaplastar na sa subong nga pagkatapos sang Surallah, ginaplano naman sang provincial government sang South Cotabato kag LGU Polomolok ang pag-establisar sang dog impounding facility sa nasambit nga banwa.
Suno kay Provincial Veterinary Officer Dra. Flora Bigot nga base sa RA 9482 UKON Anti-Rabies Act, mandated ang tanan nga mga first class municipalities kag cities nga magpatukod sang amo nga pasilidad.
May-angot sini, nagalaum man si Bigot nga kuntani makapatukod man sang dog impounding facility ang syudad sang Koronadal.
Samtang sa subong, patapos na ang construction sang dog pound sa Brgy.Centrala sa Surallah, South Cotabato sa diin ginalauman nga mangin operational na ini subong nga tuig.
Igabutang sa nasambit nga pasilidad ang mga madakpan nga ido agud masabat ang problema sa mga stray dogs nga sa masami ginatunaan sang pagkamatay sang pipila ka mga pumuluyo tungod sa rabies kag disgrasya sa dalanon.
