Davao City- Gikatakdang aprubahan sa konseho sunod semana ang balaudnong pagwagtang sa exclusive taxi lanes sa mga mall, ospital ug skwelahan dinhi sa siyudad sa Dabaw.
Kini ang gibutyag ni Davao City Councilor ug Committee of Transportation chair Conrado Baluran atol sa interbyu sa DXDC RMN Davao diin ang maong ordinansa subay sa giingong Anti-Discrimination Ordinance sa syudad sa Davao.
Sumala pa nga usa ka bayolasyon sa nasangpit nga ordinansa ang pagdeklara nga exlusive sa usa ka taxi company sa mga taxi lanes sa nasangpit nga mga dapit gumikan dili na unya makasulod pa ang ubang mga taxi units.
Dugang ni Baluran, ginapinalisar pa nila ang mamahimong multa sa mga musupak sa maong sugyot-balaudnon.
Kahinumduman nga pasado na sa committee level kaniadtong Lunes ang maong balaudnon ug gikatakdang aprubahan sa plenary session sa Davao City Council karong sunod sesyon.
RadyoMan Renz Barbarona
