Palmadiador de pulis

Na agua caliente ahora el un opicial de pulis despues este ya palmadia y ya amenasa con un security guard quien ya puede pisa con el pies del su esposa na Calle Corquera del Lunes tarde.
Con el pulis ya conose como si Insp. Arasa Abdin, de Talon-Talon y designao na PRO-ARMM.
Asegun na report, ta abaha desde na armored vehicle el guardia y ya puede este pisa con el pies del muher di Abdin.
Porcausa ta carga le grande cantidad de cen para deposita na banco del UCPB donde le ta trabaha como armored van escort, nohay mas puede pidi dispenciacion el guardia si Demson Evasco y Alas-as, Jr., 37, casao de Calarian.
Ya man derecho este adentro del banco y ya lleva con el cen para deposita.
Porcausa con este ya hace apas conele si Abdin y ya llama apuera del banco.
Y cuando ya sale el guardia apuera del banco, derepente si Abdin ya palmadia conele y gendeh pa contento ya amenasa pa su vida.
Porcausa con este, ya reporta na estacion del pulis si Evasco ya resulta para na aresto di Abdin.

Facebook Comments