Gi-proklama niadtong Sabado sa kadlawon ang pamilya Adiong nga manana-ug sa upat ka mga tag-as nga posisyon sa Lanao del Sur.
Ang incumbent vice governor nga si Mamintal “Bombit” Alonto Adiong gi-proklamang gobernador samtang ang iyang anak nga si Mujam maoy bise gobernador.
Si Mujam kanhi Sangguniang Kabataan provincial federated president.
Ang inahan ni Bombit, o apuhan ni Mujam, nga si Soraya Alonto Adiong kasamtangang gobernador sa lalawigan, apan wala na kini karon midagan sa bisan unsa nga posisyon.
Ang igsoon ni Bombit nga si Ansaruddin, o mas naila nga Hooky, subling napili sa pagka-kongresman sa unang distrito sa Lanao del Sur, samtang ang ilang ig-agaw nga si Yasser Alonto Balindong ang napili sa pagka-kongresman sa ikaduhang distrito.
Gipilde ni Balindong ang kasamtangang kongresista sa distrito nga si Jun Papandayan.
Gipilde sa mga Adiong, kinsa kandidato sa partido Lakas, gawas lang kang Hooky nga Nacionalista Party, ang mga kandidato sa PDP Laban.
Ang ilang ka-linya sa city level nga si incumbent mayor Majul Gandamra ang subli usab nga napili sa puwesto apan una na kining gi-proklama niadtong Miyerkoles sa gabii.
Gipilde usab ni Gandamra ang tulo ka mga kandidato pagka-mayor kinsa miangkong suportado sila ni Presidente Duterte.
Lakip nga gipilde ni Gandamra ang kandidato sa PDP Laban nga si Atty. Mayan Basman kinsa anak ni NCMF Secretary Saidamen Basman.
