Davao City- Wala na matabang sa mga doktor sa Southern Philippines Medical Center ang usa ka ginang ug gideklara kini nga patay pipila ka oras sa pagtambal kaniya.
Internal Hemorrhage ang gimatyan ni Elsa Aliwanan, 54 anyos, ug nanimuyo sa Bunawan ning siyudad. Base sa blotter sa traumatic center sa SPMC, nabulasot sa gutter sa kalsada ang iyang gisakyan nga motorsiklo nga gimanehoan sa iyang mister sa nasangpit nga lugar 10:20 kagabii.
Hinay lang matud ang dagan sa ilang motor apan tungod kay wala mabantayi ang gutter nagresulta kini sa pagkatumba sa motor. Maayo pagkalupad ni Elsa og pila ka metros ug gitohoan nga nabunal ang ulo niini sa semento hinungdan sa hinanaling kamatayon sa biktima.
Lakip nasamdan ang bana ug naangkon og daghang pangos sa lawas ang ilang anak apan luwas na sila sa makuyaw nga kahimtang human daling gidala sa ospital.
Nasayran nga wala nag-helmet ang mga biktima dihang nagsakay sila sa ilang motorsiklo niadtong higayona.
