Human nalubong si kanhi Cebu City Assistant Prosecutor Mary Ann Castro sa Clarin Misamis Occidental , priyoridad karon sa iyang pamilya ang pagpapangita ug hustisya sa kamatayon niini .
Ang kamaguwangang anak ni Castro nga si Annamhel Monique Castro Roa nibutyag sa interview sa DYHP nga nakig-alayon sila sa Station 2 sa kapolisan sa dakbayan sa Sugbu ug sa National Bureau of Investigation alang sa gihimo nga imbistigasyon sa pag-ambush sa piskal niadtong Enero 17 .
Apan matud ni Monique subo nga palandungon nga ang PNP ug NBI-7 pulos wa pay lead o blangko pa kung unsay posibling motibo sa pagpatay sa iyang anahan ug naglisod sila sa pag-ila sa mga mamumuno niini .
Gitug-an ni Monique nga sa dash cam sa sakyanan sa iyang inahan nga usa ka Nissan Juke ,wa nay makita nga footage niadtong Enero 17 ug sa mas sayo pa nga petsa .
Ang NBI-7 sa ilang bahin duna nay gihuptan nga mga CCTV footage gikan sa lain laing dapit nga giagian ni Castro gikan sa Ayala , apan way nakuha nga video sa pagkahitabo na ambush .
Subay niini nanawagan ang pamilya ni Castro nga tutokan ang tanang anggulo sa imbistigasyon , personal man o may kalabutan sa trabaho sa piskal .
Pipila ka adlaw sa wa pa mamatay si Castro atol sa pyesta sa Clarin nangomedya pa kini nga gusto siyang mamatay nga “beautiful” ug adto magpalubong sa iyang natawhan sa Clarin .
Si Castro nakaangkon ug lima ka samad pinusilan sa iyang lawas .
