Pamilya sa 19-anyos nga taga-Zamboanga del Sur nga gipatay sa Laguna nangayo og hustisya

47

San Pablo, Zamboanga del Sur – Hustisya karon ang singgit sa pamilya sa 19 -anyos nga batan-ong lalaki nga taga-San Pablo, Zamboanga del Sur nga gipusil patay sa usa ka police officer sa imnanan didto sa Calamba City, Laguna.
Subra ka subo ang gibati sa pamilya sa biktima nga si Leovil Brian Gumera Pelletero, 19 anyos, taga- San Pablo, Zamboanga del Sur ug nagtrabaho sa 99 Blues Sport Apparel, usa ka sportswear shop sa Laguna ug residente sa Purok Gemilina, Brgy. Sacbulan, San Pablo, Zamboanga del Sur.
Samtang gihuptan na karon sa kapulisan ang si Corporal Javier Ian Medel, 37 anyos ug nadisteno sa Cabuyao Police Station nga boluntaryong misurender sa iyang armas human sa krimen.
Base sa inisyal nga imbestigasyon, alas-2:25 sa kadlawon sa Ceris 1 Village, nag-inom matud pa si Pelletero ug ang iyang mga higala ug nag-estoryahanay gamit ang pinulongan nga bisaya samtang ang pulis ug ang iyang mga kauban usab nag-inom sa laing lamesa.
Human sa pipila ka minuto, kalit lamang nasuko ang hubog nga police officer ug nisangpot sa panaglalis sa duha ug hangtod sa gipusil ang batan-on.
Nadala pa sa ospital ang batan-an apan wala na kini masalbar sa mga doktor gumikan sa igo pinusilan niini.

Facebook Comments