General Santos City—Nagbangutan karon ang inahan sa 8 anyos nga batang babaye kansa gilugos ug brutal nga gipatay sa suspetsado sa area sa Banisil Ranch, Barangay Tambler ning syudad.
Sumala sa inahan sa biktima nga si Meraluna Legaspe nga taga Purok 39.2, Barangay Fatima ning syudad nga dili niya madawat ang gihimo sa grupo sa suspek nga si Mark Engkong nga taga Malapatan, Sarangani Province ngadto sa iyang anak.
Iyang gihingusgan nga hilabihan niya ka pinangga ang iyang anak apan gipatay lang sa mga walay puangod nga mga suspetsado. Tungod niini nanganti ang ginang nga dili niya lung-an ang suspek ug mga kaubanan niini hangtod nga dili madugta sa bilangguan.
Nasayran nga magsaulog pa unta sa iyang adlawng natawhan ang biktima kagahapong adlawa dungan sa pagkakaplag sa patayng lawas niini sa bakanteng lote dili layo sa 39.2 Barangay Fatima.
Kahinumduman nga una nang gilugos ug brutal nga gipatay ang biktima alas 9:00 ang takna sa gabie niadtong Hwebes ug kagahapong adlawa, alas 2:00 ang takna dihang nakaplagan ang patayng lawas niini. Nasikop usab si Mark Engkong kansa usa sa gitudlong suspek sa ngilngig nga krimen.
