Polomolok, South Cotabato–Nanganti ang pamilya sa biktimang si Eleazar Salamanca, hamtong ang pangidaron, nanimuyo sa purok Masaya, brgy. Magsaysay, Polomolok, South Cotabato nga dili gayud sila magduha-duha nga mopasaka ug kaso batok sa duha ka mag-igsoon nga silang Crisanto Caay, 24 anyos ug Leo Caay, 22 anyos, nga susamang nanimuyo sa Brgy.Fatima Gensan kansa maoy midunggab patay sa ilahang anak alas 9 sa gabie sa nasampit nga lugar.
Sumala pa sa inahan niini nga si Cicel nga kalit lang mibutho ang mag-igsoong suspek sa lugar ug dihang namatikdan sa iyang anak nga dunay nahitabong panaglalis sa mga kabatan-onan ug sa mga suspek miduol ang biktima aron lang uwangon ang nahitabong kasamok niadtong higayona .
Apan kalit lang kining gidunggab sa mga suspek sa makadaghang higayon sa lawas niini gamit ang kutsilyo nga miresulta sa iyang kamatayon.
Samtang gihingusgan usab ni Crisanto Caay nga usa lamang ka pagdepensa sa ilahang kaugalingon ang nahimo nila sa biktima gumikan kay gitabangan sila ug kulata niadtong gabhiona.
Nagtuo ang mag-igsoon nga murag giplanuhan na silang daan gumikan kay dunay babae nga nagtxt aron makigkita kanila sa ngitngit nga dapit sa may kapayasan kung asa pag abot nila sa lugar didto na nahitabo ang kagubot.
Gibutyag usab ni Police Lieutenant Colonel Samuel Cadungon, ang hepe sa Polomolok Municioal Police Station nga sa wala pa nahitabo ang insidente duna na matud pay kagubot ang nahitabo sa lugar .
Sumala pa niini nga basi sa pamahayag sa suspek gikulata sila sa biktima uban ang kaubanan niini hinungdan nga mibalaos ang mga suspek alang usab sa pagdepensa sa ilang kaugalingon nga misangko sa pagdunggab patay sa biktima.
Sa kasamtangan nagtingkagol sa selda sa Polomolok PNP ang nasampit nga mag-igsoong suspek samtang giandam na ang kasong homicide ngadto kanila.
