General Santos City— Dako ang paglaum ni Merly Perante, asawa ni Ronnie Repante nga mahatagan gihapon ug hustisya ang nahitabo sa 52 katao lakip na ang 38 ka mga miyembro sa media walo ka tuig na ang nakalabay.
Panghinaut niya nga sa tuig 2018 hingpit na nilang maangkon ang hustisya gumikan hilabihan na kadugay ang ilahang gipaabot aron nga maangkon hustisya. Dako man usab ang iyahang pagpasalamat ngadto sa managlahing grupo nga naga-tabang kanila.
Samtang sa kabahin sa anak niining si ian, mukuha matud pa siya ug kursong criminology gumikan gusto niyang musulod pagkapulis. Kung asa iyahang gilauman nga pinaagi niini, iyahang mahatagan ug kasulbaron ang mangilngig nga masaker sa may maguindanao.
Gibutyag mnan usab ni Atty. Jo Clemente, presidente sa NUJP nga padayon ang ilahang ginahimong pagtabang sa mga pamilya sa magsisibyang apil nga namatay sa maong masaker.
Ginapaningkamutan matud pa nila nga mapa-paspasan ang pagdungog sa maong kaso aron nga hingpit ng masilutan ang mga responsable. Lakip matud pa sa hinabang nga ginahatag ngadto sa mga pamilya mao ang scholarship ngadto sa mga anak kung asa kini ang gikan sa managlahing organisasyon sa mga magsisibya sa managlahing parte sa kalibutan.
Dugang pamahayag ni Atty. Clemente nga sagad sa mga magsisibyang napatay sa nasud ang walay naangkon nga hustisya. Busa nakig-hiusa matud pa sila ngadto sa mga pamilyang padayon ang pagsinggit ug hustisya.
Iyahang gilauman nga hingpit ng maundang ang mga pagpatay sa mga media practitioners ug posible matud pa kining mahitabo higayon nga mahatagan ug kasulbaran ang nahitabo sa maguindanao massacre.
