General Santos City–Duna nay gidudahan ang pamilya sa usa ka minor de edad nga si Alias Dongdong sa pagpatay kaniya pinaagi sa pagdunggab sa gitulugan niini sa may Purok Pearly Shell, Barangay Bula, Gensan niadtong nakalabayng gabie.
Sumala sa iyahaan sa biktima nga basi sa impormasyong nakaabot kaniya barkada ra usab sa iyang pag-umangkon maoy nidunggab patay kaniya samtang kini natulog didto sa maong lugar.
Nasayran nga anaa pa ang kutsilyong gigamit sa suspek sa tapad sa lawas niini dihang kini nakaplagan.
Samtang gibutyag sa usa ka residenti sa lugar kansa maoy nakakita sa patayng lawas sa minor de edad nga gagamitan gyud ang nasampit ug vulcasil. Gani aduna matud pa kini mga amigo nga punay niyang nakauban sa paghithit ug solvent.
Ayha matud pa nahitabo ang insidenti, adunay nadunggan ang mga residenti nga mura ug naghilak, apan ilang gibaliwala tungod sila nag tuo nga nag-away lang ang mga grupo sa batan-ong nagtambayan sa maong lugar.
Nagtuo usab ang nasampit nga posibling mga kaubanan ra sa biktima maoy nidunggab patay ngadto kaniya.
