Pamilya sa motoristang naligsan ug Fire truck dili mopasang-at ug kaso batok sa driver

23

General Santos City–Gikumpirma sa Traffic Management Unit General Santos nga nagka-areglohanay na ang kampo sa pamilyang Pulvinar og sa Bureau Of Fire Protection kalabutan sa hitabong aksidente nga gikamatay sa motoristang si Neceforo Pulvinar sa Highway Puting Bato, Brgy Calumpang ning dakbayan sa Gensan.
Gibutyag ni Patrolman Jessie Ramos III, nagpirmahanay na ug kasabutan ang asawa sa biktima og si SFO1 Mario Fuentes kinsa maoy driver sa fire truck nga nakaligis sa ulo sa biktima human kining natumba sa motorsiklo.
Pipila sa nakalatid sa Memorandum Of Agreement mao ang pag-abaga sa BFP sa galastuhon sa pagpahiluna sa patayng lawas og ang pagbyahe niini sa Matalam North Cotabato.
Kalabot niini, nagkasinabot na usab matud pa ang duha ka mga kampo nga wala nay mahitabo nga pagpasaka og kaso.
Sumala ni Patrolman Ramos, makonsidera na nga solbad ang kaso og wala nay mahitabong dugang imbestigasyon.
Giangkon usab ni Ramos nga gibuhian na gikan sa kustudiya sa traffic management si SFO1 Fuentes.(JB)

Facebook Comments