General Santos City—nangayo ug pakitabang ang pamilya sa OFW nga si Rowena Maladian, legal age, residenti sa Barangay Lumasal, Maasim, Sarangani Province kansa nagtrabaho isip Domestic Helper (DH) didto sa nasud Riyadh human nga nakasinati matud pa ug pagpang-aboso gikan sa iyang amo.
Sumala ni Ely Maladian, igsuon ni Rowena nga nahuman na ang kontrata sa iyang igsuon niadto pang Pebrero 4, 2018 apan wala matud pa kini gitugutan sa iyang amo nga makauli sa nasud Pilipinas inay gihatag matud pa kini ngadto sa laing employer.
Nasayran nga sukad matud pa niadtong Pebrero 4, wala na silay kumunikasyon gikan sa iyang igsuon human nga gidid-an matud pa kini sa paggunit ug Cellphone.
Dugang pa ni Ely nga basi sa iyang pakig-hinabi sa iyang magulang sa uwahi nilang panag-estorya wala kini gihatagan ug sweldo sa iyang amo sulod sa 11 ngadto na sa 12 ka bulan.
Hinuon gipaabot na ni Ely ngadto sa buhatan sa OWWA ang sitwasyon sa iyang magulang ug gani aduna na matud pay representanti sa OWWA nga anaa karon sa nasud Riyadh nga mutotok sa kaso sa mga OFW nga nakasinati ug pangpang-abuso gikan sa ilang amo apil na dinhi ang kaso ni Rowena Maladian.
Sa karon ila nalang gipaabot ang resulta sa lakaw sa representante sa OWWA. Samtang buot nilang makauli na si Rowena sa nasud Pilipinas.
