Davao City – Bisan pa man sakit, kinahanglan dawaton na lamang sa mga kabanay ang pagkakalas sa kinabuhi sa mga membro sa Special Action Force (SAF) 44 atol sa gitawag nga Mamasapano Massacre.
Sumala ni Liezel Inocencio, 37 anyos, taga Panabo, kinsa asawa ni SPO1 Lover Inocencio, upat na katuig ang milabay apan hinay pa gihapon ang dagan sa kaso bahin niini.
“Okay nalang kay mao man jud to nahitabo… Dapat dawatan nalang nato siya. Sakit gyud gihapon dili pa siya mawala naa jud siya pirme,” butyag niini.
Busa hustisya gihapon ang iyang ginapangayo.
Gawas niini, isip tabang kang Mrs. Inocencio gikuha siya sa PRO-XI isip Non-Uniformed Personnel (NUP) kinsa naka-assign sa Panabo Municipal Police Station gawas usab sa mga tabang sa gobyerno ngadto kaniya ug sa iyang nag-inusarang 9 anyos nga anak.
Karong adlawa, Enero 25, usa si Liezel Inocencio sa nanguna sa paghinumdom sa legasiya sa SAF 44 pinaagi sa wreath laying ceremony nga gipahigayon sa Bantayog ng Mga Bayani sa PRO-XI nahimutang sa Catitipan, Buhangin ning syudad, sabay sila PRO-XI director Chief Supt. Marcelo Morales ug PRO-XI Deputy Director Nolasco Bathan.
RadyoMaN Jason Amisola
