Pamilya sa suspect nga napatay buy bust operation dili mutoo nga nisukol sa kapulisan

Davao City – Gipahiluna na sa pamilya ang patay’ng lawas sa usa sa ilang miyembro nga napatay nga si Rodel Omega Enad, human giingong nisukol sa kapulisan sa Sta. Ana atul sa drug buy bust operation.

Sa interbyu sa DXDC RMN Davao sa kabanay sa suspek nga di lang magpaila, hustisya gihapon ang singgit sa pamilya human sa kalit nga kamatayon ni Enad.

Gi-angkon sa pamilya nga adunay kanhi kasong kawat ang suspek ug napriso apan nakagawas human sa duha ka tuig.

Nagbangutan karon ang pamilya og nagtoo nga wala kini nisukol sa maong operasyon apan gibarugan sa kapulisan sa Sta. Ana nga lehitimo ang maong operasyon.

“Unsaon pagsukol ato nga patay naman nagtalikod pa gyud,dili lang usa ka tawo ang mosulti diri kung pangutan-on nimo isa-isa halos tanan diha nakabalo,” saysay sa kabanay suspek.

Nahinabi usab sa DXDC RMN Davao si PLT.Col Ronald Lao, ang hepe sa Sta. Ana Police Station, nga notado kining suspek ug kanhi nalambigit sa akyat bahay ug illegal nga droga.

“Notorious to dating akyat bahay ug ni shift siya ug pusher pero kung makabakante motirada gihapon ang suspek. Kadtong mga five years ago, iyang gisulod ang usa ka radio station sa syudad sa Davao ug Top 6 sa Regional Level High Value Individual (HVI) (na siya),” sulti ni Lao.

Kahinumduman, natigayon ang operation alas 5:58 sa buntag, Disyembre 8, 2022 sa Sitio Sta. Cruz, Brgy. Leon Garcia, Agdao, diin malampusong napalitan ang suspek og illegal nga droga sa dihang nakamatikod giingong nisukol hinungdang na-neutralisa ang suspek.

RadyoMaN Don Pulayao