PAMILYA SA TAGDAGIT NA DUHA KA PULIS SA BAD-AS, PLACER, SURIGAO DEL NORTE MIHANGYO NGADTO SA NPA NA BUHIAN NA AN ILA MGA MAHAL SA KINABUHI
Emosyunal na tagpaabot nan pamilya sa duha ka mga pulis na tagdagit nan New People’s Army na sila ni P02 John Paul Doverte ug P02 Alfredo Degamon Jr. an hangyo na unta an buhian na an ila mga mahal sa kinabuhi sa labing dali na panahon.
Sumaya pa ni Mrs.Rouella Doverte, nahadlok na sija sa sitwasyon sa ija bana labi na kay sugod adton Nobyembre 13 human sa pagdagit an waya nay ila impormasyon, wayay kontak sa NPA. Nagproblema sila kon diin na tagdaya o kon maradjaw pa ba an panglawas. Gani bisan adton waya pa mahitabo an pagdagit, bisan kon pipila ka oras na dili maka-text o makatawag sa ija an mabayaka na sija, labi na kuman na moabot sa duha ka semana na wayay balita. Dugang isab na tagpaabot na hangyo sa inahan na si Mrs. Maruja Doverte na unta sa dili madugay mabuhian na an ija anak.
Nodangoyngoy isab sa pag-angkon si Mr. Alfredo Degamon Sr. na breadwinner nila si P02 Degamon ugsa na ila tagbati an kalisod kon waya ini sa ila pamilya. An pangasaw-unon isab niini na si Jenet Venial nagpakilooy na mabuhian na si P02 Degamon para madajon an ila plano na kasal sa Enero sunod tuig. An amo na mga hangyo an tagpaabot nan mga ini sa dihang taghimo an Press Conference kaiban an Third Party Facilitator’s Group na naunang mipasalig na pareho sa ila taghimo adton mga nabuhian na mga Prisoners of War o POW adton 2016, ila isab himoon an tanan para matabangan sila ni P02 Doverte ug P02 Degamon.
Namahayag an Spokesman nan Third Party Facilitator na si Atty. Victor Bernal na mohimo sila nan paagi sa pagkontak an NPA para masugdan an negosasyon lakip an hangyo ngadto sa kapulisan ug militar na unta ipatuman an Suspension of Military and Police Operations para luwas na mabuhian an duha ka pulis.
Agig reaksiyon sa hangyo nan amo na grupo ug pamilya, mipaabot nan pamahayag pinaagi sa RMN DXRS Surigao si Ka Oto, an Spokesman nan NPA na andam na nila buhian sila ni P02 Doverte ug P02 Degamon labi na kay taghunong na nila an imbestigasyon sa isyu sa kalambigitan nan mga ini sa illegal na droga, kotong ug extra judicial killings kay wayay direkta na partisipasyon an mga ini kundili an kanhi Chief of Police na si Chief Inspector Manolito Parazo. Hinoon an ila kundisyon na ipatuman an SUMO ug SUPO sa mga lungsod nan Alegria, Tubod, Claver, Bacuag, Gigaquit ug Placer kay didto an mga lugar na posible buhian nila an mga pulis.
