i Balita
May 23, 2020
(Photo from web)
PAMILYA SANG 59 ANYOS NGA NA- ARESTAR SA ENTRAPMENT OPERATION SANG KAPULISAN SA SAN LORENZO GUIMARAS NAGREKLAMO BATOK SA PAG-ARESTO SA ILA AMAY MATAPOS NGA GIN-ALEGAR NAGBALIGYA SANG ARMAS LUTHANG
Ginpanginwala sang pamilya ni Pedro Sacayan sang Brgy. Cabano, San Lorenzo, Guimaras nga nagbaligya ini sang armas luthang matapos nga na-aresto sang mga kapulisan sa isa ka entrapment operation sang mga otoridad.
Suno sa bata sang arestado nga si Rey Ann Sacayan, basi sa ginsaysay sa iya sang iya iloy sa brgy. Cabano, ginsulod ang ila puloy-an sang masobra walo ka kalalakihan pasado alas 9 sang gab-I sang Mayo 22, 2020 kag ginpangita ang ila amay nga yara sa sulod sang balay kag nagapatiti sang iya hinablos nga isa ka tuig.
Una nga gintayaan ang iya onse anyos nga manghud nga lalaki kag ang iya isa pa ka utod nga 20 anyos.
Pag –abot sa sulod sang balay, ginpamangkot pa sang mga lalaki ang iya amay kon siya gid man si Sacayan.
Dugang pa ni Rey Ann nga ginpangitaan sila sang iloy kag sang amay sini nga subject sang warrant of arrest apang wala sila sang may ginpakita.
Ginpahayag pa sini nga nag- offer ang iya iloy nga magtawag sang pulis, apang ginhambalan sila sang mga lalaki nga indi na kinahanglan nga magtawag pa bangud pakadtu na ang mga pulis.
Kasunod sini ginconfiscate ang cellphone sang iya iloy kag utod para wala sila sang matawgan.
Ginkakibot man nila ang paggwa sang mga armas, sang gindala na sa police station ang iya amay bangud wala naman sang nakuha sang ginsulod ini sa ila balay.
Nagapati si Rey Ann nga inosenti ang ila amay nga isa ka mangunguma.
Desidido nga mag- file sang kaso ang pamilya Sacayan batok sa mga operatiba nga nagaresto sa ila amay.
