Pursigido nga magpalab-ot sang reklamo kay Governor Arthur Defensor ang pamilya sang apat ka tuig nga bata nga taga-siyudad sang passi batuk sa Don Valerio Palmares District hospital.
Ginpahayag ni Dina Detore Andarian, tiya sang napatay nga luyag nila magpangayo sang hustisya sa kamatayon sang bata bangud sa pagpati nga pagpabaya sang mga staff sang ospital.
Una diri, ginpahayag ni andarian nga gindala nila sa nasambit nga ospital sang Oktubre 20 ang bata bangud nahilanat ini kon sa diin gin-x-ray ang bata.
Kag sang Oktubre 21 gin-urine test ini kag natukiban nga may UTI ang pasyente.
Oktubre 23 na sang matalupangdan sang iloy nga nagadaku ang tiyan sang bata kabangdanan nga ginpalab-ot ini sa doktor kag didto ginpaidalum naman sa Dengue test ang pasyente kon sa diin nangin positibo naman ang resulta.
Bangud sini, ginsaylo sang pamilya sa ospital sa siyudad sang iloilo ang bata kon sa diin napatay ini sa ICU sang Iloilo Saint paul’s hospital bangud ulihi na sang gindala.
Ginabasol sang pamilya ang mga staff sang Don Valerio Palmares district hospital sa atrasado nga pag-diagnose nga dengue ang balatian sang pasyente.
Ginareklamo man nila ang indi pag-release sang ospital sang x-ray result sang bata bangud sa balayran nga 50 pesos nga wala man sila ginpahibalo nga dapat nila ini bayaran.
