Murcia, Negros Occidental – Hustisya ang panawagan sang nabilin nga pamilya sang isa pa ka overseas Filipino worker (OFW) gikan sa pungsod Kuwait.
Nagbalik sa pungsod ang OFW nga si Josie P. Lloren sadtong Enero 26, 2018, kag ginkakibot sang iya pamilya kun ngaa nga ginpapauli ini siya nga may ginabatyag nga malala nga sakit.
Gilayon nga gindala sang pamilya Lloren ang OFW sa isa ka ospital sa Caloocan. Didto kag nagtaliwan ang OFW matapos ang duha ka semana nga pagtinir sa ospital.
Suno sa death certificate sini, cardiorespiratory arrest secondary to cerebrovascular disease ang rason sang kamatayon ni Lloren.
Pagpati sang magulang nga babaye ni Lloren, may kaangtanan ang pagkapatay sini ang pagpanugid sang OFW sa pagpang-abusar sang misis sang iya amo sa Kuwait.
Ginpasibangdan sang misis ang OFW nga may relasyon sila sang iya amo.
Nagpanugid si Lloren sang pagpang-abusar sa iya utod pinaagi sa social media sadtong Nobyembre 2017.
Amo yadto ang pinaka-ulihi nila nga pag-istoryahanay antis ang pagpuli ni Lloren sadtong nagligad nga bulan.
Luyag subong nga mahibalu-an sang pamilya ni Lloren kun ano ang matuod-tuod nga natabo sa OFW sa Kuwait kag kun ngaa wala siya nabulong didto.
Tuig 2015 sang nagtrabaho sa Kuwait si Lloren para suportahan ang tatlo sini ka mga kabataan sa Davao City. – RCSG / iFM News
