PAMILYA SANG PINOY NGA NASUNUGAN SA MACAU BANGUD SA CHRISTMAS DECORATION, NAGAKINAHANGLAN SANG BULIG

Report ni: Jennifer Palomo Debaja

Ginlamon sang kalayo pati ang mga importante nga papeles sang 9 ka miembro sang pamilya Angeles sang nasunog ang gina estaran nga apartment sa Rua do Dr. Pedro Lobo sa downtown Macau kahapon sang kaagahon.

Dose tanan ang gindala sa ospital matapos nakahaklo sang tuman ka damu nga aso tuga sang sunog nga nagluntad takna alas 3:30 kahapon sang kaagahon sa ikatatlo nga panalgan sang apartment nga gina estaran sang pamilya Angeles.


Base sa pahayag sang isa sa mga residente sang building, gulpi sila nakabati sang lupok nga ginapatihan nag overheat nga electric wire sang Christmas decoration kag amo ang gintunaan sang sunog.

Samtang 40 pa gid ka mga residente sa nasambit nga apartment ang gin evacuate.

Sa pahayag sa media ni Inna Angeles, utod sang nasunugan, nagapati sila nga faulty electrical wiring ang ginhalinan sang sunog.

Dugang ni Angeles, solo suksok nga panapton ang yara sa iya mga himata sang ginsalbar ang ila kaugalingon. Pati mga importante nila nga mga dokumento natupok gid sa sunog.

Sa karon, temporaryo nga nagatinir ang pamilya sa ila himata.

Sa mga gusto magpalab-ot sang bulig sa pamilya palihog kontak kay Ms. Inna Santos Angeles sa telepono : +853-6338 9690

Location : Infante Henrique.. Rua Pedro Nolasco along BCM Macau.

Facebook Comments