Davao City – Nagmaya sa tumang kalipay ang pamilyang Gilvero human ila nang nakita ug nahimamat pag-usab si Mary Grace Gilvero, 20 anyos human sa pito na ka bulan nga wala na gayud kiniy balita sukad nga nilakaw kini niadtong Bag-ong Tuig sa ilang lugar sa Prk. Malantawon, Brgy. Lawigan, Mati City, Davao Oriental padulong sa Davao City.
Pinaagi sa RMN Serbisyo Publiko gipanawagan ug gipangita si Mary Grace o mas nailang Princess Grace human nga nidangop ang inahan niini nga si Marilyn Gilvero sa sibyahanan sa DXDC 621 RMN Davao aron ipanawagan ang iyang na-missing nga anak.
Sa pagpanubay sa RMN Team sa mga kahigalaan ni Grace dinhi sa dakbayan sa Davao pinaagi sa Facebook ulahi nila kining nakahimamat niadto pang Hunyo.
Hangtod sa nakaabot gayod ang maong mensahe ngadto kang Grace ug dali kining niadto sa balay sa iyang iyaan sa may Boulevard ning dakbayan.
Daku ang pasalamat sa inahan nga si Marilyn nga buhi ug anaa sa maayong kahimtang si Mary Grace ug dili usab mao ang iyang duda nga posible ang iyang anak kadtong gi-chop chop nga babayeng napalgan niadtong niligad nga semana.
Sa interbyu usab sa RMN Team kang Grace nangayo kini’g dispensa ngadto sa iyang mga ginikanan kay nabuntis kini ug mao kiniy hinungdan nga wala pa niya pahibaloa ang iyahang pamilya.
Samtang mensahe ni Marilyn ngadto sa tanang mga ginikanan nga kun man ugaling mawala ang ilang mga anak pangitaon gayod kini ug dili usab pasagdan.
Dugang sa inahan nga nagpasalamat usab kini sa tanang taong nitabang kanila ug sa Buhangin PNP sa pagpanguna sa station commander nga si PCI Jack Tilcag sa pagatiman kaniya.
Sa pagkakaron nagpabilin si Mary Grace uban ang iyahang ka-live in partner ug bag-ong nahimugso nga anak dinhi sa lungsod samtang mubalik na ngadto sa Mati City ang iyang mga ginikanan.
RadyoMaN Aimee Guinita
