Davao City – Makapahinganga nga parada, maanindot ug mabulukon nga klase sa pagpasundayag sa mga bulak, kaabundansya sa gulay ug artistiko nga mga desenyo sa floral float, kana maoy usa sa mga ginaatangan kada tuig sa Kadayawan Festival dinhi sa siyudad sa Davao.
Kaniadto, mas ilado kini sa tawag nga Pamulak sa Kadalanan apan karon gitawag na kining Pamulak sa Kadayawan nga sagad ginabutang sa katapusang adlaw sa selebrasyon isip highlight sa pagtapos sa pagsaulog sa tinuig nga festival sa dakbayan.
Kada tuig ginasalmutan sa mga Davaoeño ug mga bisita ang floral float parade ug niadtong miaging tuig lang, gidugang ang Pitik sa Kadayawan, usa ka drum beating competition sabay sa Pamulak aron dugang sa festive vibe.
Sayo pa lang sa buntag, dagsa na ang mga tao ug nagapangita og eksaktong pwesto aron makakita sa engrandeng parada diin dili gyud diha mawala ang pagkuha og mga litrato ilabi na karon nga uso na ang social media, dali na kining ma-post pinaagi sa caption nga makadani sa uban nga buot musaksi pa.
Sumala ni Emmanuel ‘Wadab’ Babao, event chairperson sa Pamulak ug Pitik sa Kadayawan 2018, mas ma-excite ang mga manan-aw karong adlawng Domingo, Agosto 19, 2018 tungod sa bag-ong pakulo sa maong aktibidad.
“They have a chance nga musakay sa mga float sa mga contingents para ma-experience nila og unsa gyud ang festival dito sa Davao and all the contingents are advised nga kung may sasakay na mga turista, ipa experience gyud sa ila,” segun niini.
Gawas usab sa mga minilyon nga bulak nga gidesenyo og tao, agila ug uban pa nga gipangmungtar sa float, aduna usab mga artista, models, ug representante sa onse ka mga tribu sa syudad sa Davao ang mukumpleto sa imung talan-awun sa maong aktibidad.
Karong tuiga, moabot sa kapin 60 ka mga competing ug non-competing floats ang muparada sa kadalanan diin ang grand prize sa big category makadawat og P700,000, P500,000 sa 2nd prize, P300,000 alang sa 3rd prize ug 2 ka consolation prizes samtang sa Pitik sa Kadayawan, makadawat ang grand winner og P200,000, P150,000 alang sa 2nd prize ug P100,000 sa 3rd prize gani aduna usab 2 consolation prizes nga P50,000 each ug ang non winners mag-uli og 10,000 pesos each.
Sugdan ang parada eksakto alas 6 sa buntag ug gitinguha nga mahuman alas dose sa udto.
Tinuod nga ang Pamulak ug Pitik sa Kadayawan maoy mutapos sa festive vibe sa tinuig nga engrandeng selebrasyon matag bulan sa Agosto sa siyudad sa Davao apan ang mga handurawan niini magpabilin kanunay sa huna-huna ug kasing-kasing sa mga tawong sugod hangtod natapos nakigduyog gyud sa Kadayawan Festival.
RadyoMaN Renz Barbarona
