Davao City – Hugot nga gibantayan karon sa mga awtoridad ang boundary sa Davao City ug Davao del Norte aron dili makasulod dinhi ang mga suspek sa pagpanulis og Chinese national sa may Panabo City, Davao del Norte diin kapin kun kulang P3-M ang nakuhang kwarta sa biktima.
Sa interbyu sa RMN Davao kang Task Force Davao Commander Col. Consolito Yecla nga gipaalerto niini ang kasundaluhan sa matag checkpoints.
Segun ni Yecla operational na usab ang X-ray baggage scanner machine sa may Lasang checkpoint nga dakong ikatabang karon sa paspas nga paginspeksyon sa mga baggahe sa mga pasahero kung aduna kiniy mga kontrabando.
Samtang, dili usab itugot ni Davao City Police Office head Police Col. Alexander Tagum nga mamahimong taguanan ang Davao sa mga kriminal.
Matud ni Tagum aduna silay mga intensified focused police operations ubos sa Oplan R.A.T. (Robbery/ Hold-up, Akyat Bahay and Theft) ug Oplan Kalinaw nga programa alang sa seguridad sa dakbayan.
Nagbahad usab kini sa mga dautang elemento adunay planong kabuang dinhi sa dakbayan.
“We would like to make Davao City the most dangerous city for criminals and terrorists to operate. Pwedi sila mu-operate, pwedi gud pero siguraduhon nila nga makasibat sila ug ma-enjoy nila ang ilahang gihimong kabuang,” sumala ni Tagum.
RadyoMaN Aimee Guinita
