Davao City- Human nga nagmalampuson ang operasyon sa Davao City Police Office kun DCPO- Traffic Group ngadto sa pagsikop sa mga malapason sa balaod trapiko sa kadalanan diin kapin 20 ka mga uso-uso nga jeep pa-Toril area ang nasikop tungod sa nagkalain-laing basyolasyon, gikatakdang himuon ang usa ka panagpulong tali mga operators sa uso-uso nga jeep, traffic group ug police station 8 kun Toril PNP aron hisgutan ang mga mulo kalabotan sa mga bayolasyon sa mga uso-uso dinhi sa syudad.
Kini ang gibutyag ni DCPO-Traffic Group Chief Superintendent Ernesto Castillo atol sa interview sa programang Kuskos Batikos ni RadyoMaN Erin Lumosbog diin karong adlawng Sabado, alas 10 sa buntag himuon ang dayalogo.
Kahinumduman nga kagahapong adlawa, 20 ka mga uso-uso nga jeep ang na-issuehan og Temporary Operating Permits (TOPs) subay sa ilang gipahigayong operasyon sa Ulas, Toril, ug downtown ning syudad sa Davao.
Matud ni Castillo, daghan na siya og nadawat nga reklamo sa operasyon sa mga uso-uso nga jeep hinungdan nga ilang gihimo ang maong operasyon ug dili sila muundang sa pagsikop sa mga malapason aron kini madisiplina.
Kasagarang nadakpan mao ang pagsupak sa speed limit, diin kadaghanan sa ilaha naga over speeding, kusog nga pagpatugtog sa mga sakyanan, overloading, cutting trip, illegal terminal, mga kalapasan sa Anti-Distracted Driving Act (ADDA) ug Land Transportation and Traffic Code.
RadyoMaN Renz Barbarona
