Roxas City, Capiz- Hugot nga ginakondena sang progresibo nga mga grupo ang ginhimo nga raid sa mga panimalay sa banwa sang Tapaz sang nagligad nga Disyembre 30, 2020 kun sa diin ginserbehan sang search warrant ang mga subjects nga nagresulta sa kamatayon sang siyam (9) tanan ka mga persona.
Ginpahayag ni Darlene Blando-Surriga, spokesperson sang grupo nga nagpatigayon sang prayer rally sa Roxas City bandstand kagab-i, ginakabig nila nga ‘masaker’ ang amo nga tikang nga nagresulta sa maduguon nga insidente.
Nagsindi man ang mga ini sang kandila bilang simbolo sang pagpasidungog sa mga napatay kag pagkondena sa makahas nga aksyon nga ginhimo sang mga otoridad.
Iya nga ginpunto nga indi sang New Peoples Army (NPA) ang mga nagkalamatay sa baylo, ang mga ini ang ordinaryo gid lamang nga mga pomuluyo nga tumandok sang nasambitan nga lugar.
Iya man nga ginpanawagan sa mga lokal nga lideres sa Capiz nga magdihon sang mga tikang agud nga maimbestigahan ang amo nga insidente.
