Pagadian City – Posible nga dunay mahitabo nga face to face nga klase sa pipila ka mga lugar sa rehiyon 9. Apan limitado lang sa duha ka oras og 15 ka mga estudyante ang tugutan nga musalmot sa session. Kini ang gibutyag ni Department of Education Region 9 Director Isabelita Borres, sa interview sa DXPR Pagadian human natala sa probinsya sa Zamboanga del Sur ang unang kaso sa hikog tungod sa kalisod sa Learning Modules.
Apan gipaklaro ni Director Borres nga naghulat pa sila og approval sa DepEd Central Office ayha ipatuman ang maong recomendasyon. Samtang gikatakda nga ilubong karong adlaw nga byernes ang 15-anyos nga estudyante nga taga- Lapuyan, Zamboanga del Sur nga nangandoy unta nga mahimong pulis apan natuldukan dihang gihunus ang iyang kaugalingong kinabuhi gumikan kay gilisdan pag-ayo sa mga subjects nga Math og Science.
Nagtibi nga nanawagan sa DepEd ang amahan sa biktima nga si Tatay Regolado Erad nga undangon nalang ang modular learning aron wala nay laing kinabuhi nga masayang. Aminado, si Tatay Regolado nga nagpatabang unta kaniya ang anak nga si Emarson Erad, apan subo niyang gi-angkon nga wala siyay kabangka-agan kay Grade 2 lang ang iyang nahuman.
Ning kasamtangan nihimo na usab og separarte nga investigation ang DepEd Zamboanga del Sur Division, labot sa maong hitabo.
