ILOILO – Posible maumpisahan na ang pagtukod sang Panay-Guimaras-Negros bridge sa tuig 2020.
Apesar aminado si NEDA 6 Regional Director Ro-ann Bacal nga indi basta-basta ang proseso sa pagpatindog sang taytay, iya ginpahayag nga sa 2020 mahimo nga maumpisahan na ang proyekto.
Ini matapos nagsapol ang NEDA 6 Director sa mga representante sang Chinese Ministry of Commerce angot sa ila ginahimo nga Pre-Feasibility study sa nasambit nga proyekto.
Ang Pre-Feasibility Study mahimo matapos subong nga tuig suno kay Bacal kag sa tion nga matapos na ini, magasunod ang detailed engineering sa 2018.
Magasunod naman diri ang detailed engineering procurement kag kon matapos ini, maumpisahan ang pagtukod sang taytay sa 2010.
Suno sa NEDA 6,indi pa mapat-ud sa karun kon ano ang mangin first phase sang proyekto apang nagala-um sila nga Iloilo-Guimaras ang paga-unahon bangud mas mahapos ini kon ikumparar sa Guimaras-Negros Phase.
Ang Panay-Guimaras-Negros Bridge kabahin sang Build! Build! Build! program sang Duterte Administration nga nagatuyo nga pabaskugon ang pagpatuman sang infrastructure projects sa bilog nga Pilipinas.
