General Santos City— Balhug na sa mabugnaw nga bilangguan ang usa ka panday human kining gisikop sa mga otoridad tungod sa kasong kawat ug sextortion. Ang suspek naila sa pangalan nga usa ka Rodel Kinoc Tule, 18 anyos nga taga Barangay San Isidro.
Sumala sa report sa kapulisan, nagpakitabang ang usa ka estudyante nga si Alyas Grace human sa gihimo sa suspek kaniya nga matud pa nakighagit ug pakighilawas bugti sa pag-uli sa iyahang cellphone nga nawala.
Asoy sa biktima nga uwahe silang nagbansay kilid sa buhatan sa LTO tapad lang sa city hall kauban ang iyahang mga classmates ug gikuha sa suspek ang iyahang bag. Dinhi iyaha nang gitext ang posibleng nakakuha o nakakita sa iyahang cellphone ug mireply man usab ang suspek apan ihatag lamang niini ang cellphone sa biktima sa kondisyon nga kini makighilawas kaniya.
Dinhi na nagpakitabang ang biktima sa mga kapulisan. Nagkasinabot ang duruha nga magkit-anay sa usa ka lodge sa Barangay City Heights ug dinhi na naaktuhan ang suspek ug nadakpan. Gawas sa cellphone nga nakuha sa suspek, nakuhaan usab kini ug usa ka sachet nga gituuhang shabu sulod sa iyahang bulsa.
Sa pakighinabi sa RMN Gensan, giangkon sa suspek nga iyahang gikuha ang cellphone sa biktima, apan bakak matud pa ang pasangil nga sya nakighagit ug pakighilawas niini ug labaw sa tanan dili matud pa iya ang shabu nga nakuha sa iyahang bulsa. Sa kasamtangan gihan-ay na ang tukmang kasong ipasang-at batok sa suspetsado.
