Davao City – Gipasalig sa tag-iya sa gambalay kung asa nakuryentihan-patay ang usa ka panday sa Magsaysay, Davao del Sur nga abagahon ang galastuhon sa pagpahiluna sa biktima.
Sa intebyu sa DXDC RMN Davao kang Police Captain Harold Untalan, Acting Chief of Police (COP) Magsaysay Municipal Police Station (MPS), giila ang biktima nga si Gerardo “Gerry” Quiñones, 48-anyos, laborer, residente sa Purok 13, Barangay Poblacion, Magsaysay, Davao del Sur.
Gisaysay ni Untalan, samtang nag-ayo og atop sa ikaduhang andana sa usa ka commercial building si Quiñones sa Brgy. Poblacion, aksidente niining naigo ang primary line sa Davao del Sur Electric Cooperative (DASURECO) nga adunay 13,000 voltage hinungdan nga nakuryentihan kini nga miresulta sa kamatayon.
Nasayran nga ikaduhang higayon na nga dunay nakuryentihan sa maong building rason nga nakigkoordinar na ang kapulisan sa DASURECO aron mabutangan og plastic barrier ang mga linya sa kuryente sa gambalay.
Pahimangno sa pulis sa mga panday nga magbaton og safety gears ilabina kung duol sa linya sa kuryente ang ayohon aron kalikayan ang susamang insidente.
“Kapag may mga building nga duol sa electric line, kung pwede may plastic siya (nga) barrier, para at least in the future, in case naay magpatrabaho, at least dili na (madisgrasya). Baka ba masundan pa,” tambag ni Untalan.
Nasayrang kanhi boxing champion ang biktima sa super featherweight tuig 1996.
RadyoMaN Kirby Manzon, RadyoMaN Abi Bibera
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
