CAPIZ – Magapatigayon sang symposium ang Liberal Party sa Capiz agud kuhaon ang opinion sang mga nagkalain-lain nga sector sa syudad sang Roxas may kaangtanan sa pagpili sang masunod nga alkalde sang syudad sang Roxas. Ginpahayag ni Former DILG Secretary Mar Roxas nga importante ang consultation sa mga sector kaangay sang NGOs, academe, religious sector, fisher folks, businessmen kag mga ordinaryo nga pomuluyo.
Sa ginpatigayon nga pagsinapol sang mga katapo sang Partido Liberal sa balay sang anay tiglikom sa Barangay Baybay kahapon, ginpahayag ni Roxas nga wala pa sang pinal nga pangalan sang mga kandidato ang ila partido para sa pagka-alkalde sang syudad. Ginalauman nga igapagwa sang partido ang kompleto nga linyada pagkatapos sang symposium kag antes magsugod ang filing sang Certificate of candidacy.
Nahibaluan nga nagatuhaw ang pangalan nanday Former Vice Mayor Ronnie Dadivas, City Councilor Matthew James Viterbo, Vice Mayor Erwin Sicad sa pagka alkalde kag City Councilor Powell del Rosario sa pagka bise alkalde. Ginpahayag dugang ni Roxas nga may nabilin pa nga termino sanday Governor Antonio del Rosario kag Congressman Emmanuel Tawi Billones, kag bangud wala man sang may nagpalapit sa anay tiglikom nga nagapabutyag sang interes nga magpapili sa posisyon nga ginapungkuan sang duha rasun nga magapabilin nga kandidato sang partido si del Rosario kag Billones. *”They are incumbents, they have remaining eligibility sa pagpadalagan. No one has come to me to challenge their nominations. So they are our candidates.”*
Kalakip sa mga nagtambong sa pagsinapol sanday Capiz Governor Antonio Del Rosario, 1st District Rep. Emmanuel Billones Sr., City Mayor Angel Alan Celino, mga alkalde kag konsehales. Wala man nakatambong si Vice Governor Esteban Contreras apang yara man ang presensya sang iya amay nga si Pontevedra Mayor Esteban Evan Contreras kag utod nga si anay Mayor Steve Contreras. Indi man mahibaluan kon anu ang mangin kapalaran ni Contreras bangud yara na ginatugyan sa gihapon sang partido ang posisyon sa pagkagobernador para kay del Rosario. Sa madumduman nga madugay na nga nagpabutyag sang iya interes sa pagpapili sa pagka gobernador si Contreras bangud magatakop na ang term sini bilang bise gobernador.
