Davao City – Naghilak ang inahan sa 6 anyos nga batang biktima kinsa nakaplagang patay sa Matina Pangi ning syudad sa Davao kagahapon sa buntag samtang gisaysay ang pagpahiluna sa iyang anak.
Sa pakighinabi sa DXDC RMN Davao kang alyas Karla, inahan sa biktimang si alyas Jane, gisulti niini nga hulaton una nila mahuman ang otopsiya sa iyang anak nga sugdan karong adlawa ayha nila kini ihaya sa ilang lugar.
“Sakit huna-hunaon nga gisunog akong anak unya sunugon napud og balik. Di naman gud maklaro ang nawng, i-cremate nalang siguro namo”, segun sa inahan.
Dugang niya nga bisan sakit man dawaton ang gidangatan sa iyang anak, mapasalamaton gihapon kini nga giangkon sa suspek ang krimen tungod mahatagan og hustisya ang 6 anyos nga bata.
Kahinumduman nga na-missing si alyas Jane niadtong September 17, 2018 diin saysay sa inahan nga namatikdan niya ang pagkalawa sa iyang anak bandang alas 4 sa hapon ug siya nakulbaan na pag ayo tungod gituyok na nila ang ilang kasilinganan apan wala gihapon kini makit-I diin nasayran nga fiesta sa ilang lugar niadtong tungora ug nahadlok siya gumikan daghan og hubog.
Una ng gibutyag sa suspek nga si Rico Jay Labao, 27 anyos nga tungod sa kahubog ug daw nawala na sa iyang kaugalingon ang hinungdan nganong napatay sa suspek ang 6-anyos nga batang babaye.
RadyoMaN Renz Barbarona
