Davao City – Gitulisok sa Brgy. Tomas Monteverde Barangay Health Worker (BHW) head ang Juvenile Justice Law ni Senator Francis ‘Kiko’ Pangilinan sa kamatayon sa dos anyos nga si Cristine Duterte Miole sa Tagum City.
Gibasol ni BHW Head Carlo Navarro ang balaud gipanday ni Pangilinan sa nahitabo sa bata nga gilugos ug gipatay diin ang mga suspek mga menor-de-edad nga nag-edad og 12 ug 14 anyos.
Ang biktima nakaplagan sa kasagbutan sa hilit nga barangay sa Tagum City alas-4:00 sa hapon niadtong Martes human kini nawala Domingo sa kadlawon.
Matud ni Navarro, nakabaton og kaisog ang mga bata karon sa pagbuhat og krimen tungod kay nasayod sila nga maprotektahan ug dili sila makasuhan sa balaUd nga gipanday ni Pangilinan.
Gipanawagan niini nga panahon na aron i-repeal kun amyendahan ang Pangilinan Law aron makasuhan ang mga bata nga makakumiter og salaud aron masalba pa sila sa pagbuhat og dugang krimen.
Gimahay usab sa BHW head ang kakuwang sa giya sa mga ginikanan sa ilang mga anak ug ang sobra nga exposure sa social media ug pagtan-aw og bayolenteng mga silida sa mga teleserye sa mga televisions.
Subay sa ilang pagtoon, kasagaran sa mga bata nga pinasagdan sa mga ginikanan og grabe ang exposure sa social media ug pagtan-aw sa bayolente nga mga salida sagad mahitumpawak sa krimen.
Pahimangno na lamang ni Navarro alang sa tanan nga mag-igmat sa tanang panahon aron dili mabiktima sa mga menor-de-edad nga adunay ‘criminal tendencies’ sama sa nadangatan sa dos anyos nga batang babaye sa Tagum City.
RadyoMaN Joel Viray
