iFM Laoag – Ipatpatungpal ti Bagnos Multipurpose Cooperative iti ili ti Banna ti “panic lista” kas tulongda kadagiti umili iti daytoy a tiempo ti enhanced community quarantine wenno ECQ.
Kuna ni Amelia Bautista, project manager ken development officer ti Bagnos, babaen iti “panic lista” mabalin a mangala iti bagas ken nadumaduma a goods iti kooperatiba ket mabayadan dagitoy inton malpas ti agdama a health crisis.
Dagiti kangrunaan a maserbian babaen ti “panic lista” ket dagiti customers a kameng ti nasao a kooperatiba.
Malaksid iti “panic lista”, mangipapaay pay ti Bagnos MPC ti snacks para kadagiti frontliners iti ili ti Banna, Pinili ken Nueva Era.
Inpalgak ni Bautista a kabayatan ti ECQ inpababada ti presio dagiti produktoda ken saanda nga agsingir ti penalty kadagiti late payments dagiti nagloan iti kooperatiba.
Innayon ni Bautista a panagtitinnulong ti pilosopia ti Bagnos MPC, isu nga aramidenda ti amin a kabaelanda tapno makatulong kadagiti umili bayat iti mapaspasaran a pandemic.
Ti Bagnos ket maysa nga agrarian reform beneficiaries organization nga adda iti aywan ti DAR Ilocos Norte. [Detalye Manipud ken ni Jorge Guerrero]
– Bernard Ver, RMN News
