Davao City – Panimalos ang gilantaw nga motibo sa pagpatay ug gitohang paglugos sa 10-anyos nga batang babae sa P-4 Suwaon, Kapalong, Davao del Norte niadtong Dominggo, July 28, 2019.
Sa interbyu sa DXDC RMN Davao kang Police Major Glen Salubo sa Kapalong PNP, giila niini ang biktima nga si alyas Lily samtang ang suspek mao si Albert Berongga, 34-anyos, taga Brgy. San Isidro Loreto, Agusan del Sur.
Saysay ni Salubo nga nanimalos lamang sumala pa ang suspek sa gibuhat sa amahan sa bata ngadto sa iyang asawa diin gidulog sumala pa kini sulod sa duha adlaw.
“Naa sya’y misis nga 14 years old, gikuha daw allegedly sa papa sa bata. Gipangita niya iyang asawa kay 2 days wala nakauli. Ana tong papa nga tabangan ta ka’g pangita. Diay to uban-uban pa sya’g pangita pero siya diay nagtago diay. After 2 days nakita niya nagdulog daw sila atong iyang asawa. Unya iyang gisita iyang asawa. Dili daw siya makapalag kay mahadlok sya nga patyon,” saysay ni Salubo.
Kasong murder ang gipasaka sa suspek samtang posibleng makasuhan usab kini og rape kung mapamatud-ang gilugos niini ang menor de edad.
Dugang ni Salubo nga bag-ohay lamang usab kini nakagawas sa prisohan tungod gihapon sa kasong lugos ug nag-atubang usab kini og lain pang kaso niadtong menor de edad pa kini.
“Sa 14 years old siya nag-atubang siya’g attempted murder. Pag 17 niya, na priso siya sa Mabini, illegal fishing. Nakagawas ni bag-o lang. Naka kaso pud siya’g rape diri sa Agusan banda, 3 years and 3 months ata sya napriso,” saysay ni Salubo.
RadyoMaN Kirby Manzon
