Panukala na gawing kasong kriminal ang red-tagging, dapat ikonsidera kasunod ng maling listahan ng AFP

48

May nakikitang batayan ngayon si Committee on National Defense and Security Chairman Senator Panfilo “Ping” Lacson para ikonsidera ang mga mungkahi na i-criminalize ang red-tagging.

Dahil dito ay inatasan ni Lacson ang Secretariat ng Committee na repasuhin ang final draft ng committee report ukol sa ginawa nilang serye ng imbestigasyon sa red-tagging.


Ang hakbang ni Lacson ay makaraang lumabas na ang listahan ng Armed Forces of the Philippines (AFP) ng mga naging miyembro ng New People’s Army (NPA) na diumano’y nahuli o napatay sa pakikipagsagupa sa militar ay buhay at malaya pa pala.

Pinagsusumite rin ni Lacson ang AFP ng karagdagang dokumento para ma-validate ang mga student activist na pinangalanan ng AFP at ng kanilang mga iprinisintang testigo na umano’y miyembro ng NPA sa hearing ng Senado ukol sa red-tagging.

Kasabay nito ay pinapatiyak din ni Lacson sa AFP na makakastigo ang sinumang direktang responsable sa palpak na listahan ng mga UP graduate na umano’y miyembro ng NPA at naaresto o napatay sa combat operations.

Facebook Comments