Manila, Philippines – Ipinaliwanag ng DOJ panel of prosecutors ang naging partisipasyon ng mga opisyal ng Food and Drug Administration o FDA sa iregularidad kaugnay ng Dengvaxia anti-dengue vaccination program.
Tinukoy ng panel ang ginawang pag-apruba ng FDA sa registration ng Dengvaxia sa kabila nang hindi pa nakukumpleto ang clinical trials sa bakuna.
Ayon sa panel, dalawa ang parallel clinical trials sa Dengvaxia sa limang bansa sa Asya at ang una at ikalawang ang clinical trials ay makukumpleto pa lamang noong November 2017 at April 2018.
Anila, January 2015 nagsumite ng aplikasyon sa FDA ang Sanofi Pasteur at December ng kaparehong taon ay inaprubahan ng FDA ang marketing ng Dengvaxia kasabay ng pag-iisyu ng product registration.
Lumalabas din na ang purchase request sa Dengvaxia vaccine ay ginawa noong January 2016 at ang aktwal na pagbili ay ginawa agad noong March 2016.
Si dating Health Secretary Janette Garin at dalawang opisyal ng Food and Drug Administration (FDA) ay kasama sa mga inirekomenda ng DOJ na kasuhan ng reckless imprudence resulting in homicide dahil sa anti-dengue vaccination program irregularity.
