Para indi pagbulagan sang nobyo, dalagita nga yaya nagpakuno-kuno nagbusong kag nagbata, lapsag nga iya ginabantayan ginbitbit sa Miag-ao

BACOLOD CITY – ( UPDATE ) May hurubaton nga nagasiling: “ Oh pag-ibig pag pumasok sa puso nino man, hahamakin ang lahat, maging akin ka lamang.”

Isa karon ka ehemplo diri ang natabo sa isa ka 19 anyos nga dalaga nga kabulig sa puluy-an nga gindakup sang pulis matapos iya gindala sa Iloilo ang bata sang iya amo kag ginpakilala nga bata nila ini sang iya nobyo para indi siya pagbulagan.

Gin-inquest na sini nga aga sa City Prosecutors Office ang kaso nga kidnapping batuk sa suspek nga nakilala kay Airesh Martir, 19 anyos, residente sang Purok Santol, Brgy. Mandalagan, Bacolod City.


Sa imbestigasyon sang Bacolod City Police Office, nahibaluan nga tatlo ka semana pa lang nga naga obra bilang Yaya si Airesh sa mag-asawa nga George kag Norilyn Salas, pumuluyo sang Brgy. Alijis, ciudad sang Bacolod.

Suno sa mag-asawa nga madugay na nga kilala sang ila pamilya ang suspek bangud nga kaingud nila ini sadto sa Purok Santol, Brgy. Mandalagan, Bacolod City rason nga ini ang ila gintanyagan nga mag-obra bilang yaya sang ila anak.

Base sa imbestigasyon, sadtong September naga post na sa iya facebook account si Airesh sang mga pictures kaupod ang bata kon diin iya gina claim nga bata niya ini.

Pahayag sang mag-asawa nga wala man sila nagabalaka sang una sa ginahimo nga ini sang ila kabulig.

Apang sadtong Lunes, Abril 15 ginkulbaan na sanday George kag Norilyn bangud wala nakapauli ang suspek kag bitbit pa sini ang ila anak nga naga edad pa lamang sang 1 ka tuig kag 4 ka bulan.

Gilayon nga nagpadulong sa pulis ang pamilya kag nagpangayo sang bulig gani nagpatigayon sang imbestigasyon tubtub nga nakita sa Facebook ang account sang nobyo sang suspek.

Didto kag nahibaluan nga taga banwa sang Miag-ao sa Iloilo ang boyfriend sang suspek gani nagpati ang utoridad nga gindala ini didto sang babayi.

Bangud sini, nagpakig-angut gilayon ang Bacolod City Police Office sa Miag-ao PNP gani nadakpan ang suspek upod ang bata nga iya ginkuha.

Sa karon yari na diri sa ciudad sang Bacolod ang suspek kag ang bata nabalik na sa iya pamilya.

Sa bahin sang suspek iya gin-ako nga gindala gid man niya ang bata sa Miag-ao, Iloilo agud ipakilala ini sa pamilya sang iya nobyo nga si Christopher kag agud magdul-ong sang kwarta nga ginpadala sang iya nobyo.

Suno kay Airesh nga wala siya plano nga magdugay sa Iloilo, kundi mabalik man sila kuntani pagkasunod nga adlaw (Abril 16) apang ginpadakop sya sa pulis.

Nagpensar ang suspek nga kon ipakilala niya sa iya nobyo nga anak nila ini, akuon sang lalaki ang responsibilidad kag indi siya pagbulagan.

Angut sini, nagpangayo sang pasaylo si Airesh sa iya mga amo kag nagsiling nga naghinulsol na siya sa iya ginhimo nga pagtunto sa mga ini kag kuntani mapatawad lang siya.

Nagpangayo man sang pasensya si Airesh sa iya nobyo apang iya ginkumpirmar nga nagbulagay na sila kahapon./DYHB BACOLOD

Facebook Comments