Davao City – Gipahibalo atol sa final briefing sa Parada Davaoeño nahitabo adlaw’ng Lunes ngadto sa dul-an 400 ka mga partisipante ang mga sumbanan nga angay tumanon karong Marso 16.
Gibatbat ni City Treasurer’s Office Head Atty. Erwin Alparaque nga tag-usa lamang ka float ang itugot atol sa parada ug limitado lamang ang mga walking ug walking’ ug adunay mga motor o sakyanan nga mga contingents sa 50 ka mga partisipante.
Ang standard nga sukod sa float kay 8 ft. x 16 ft. ang hitas-on ug dili kini mulapas sa 12ft gikan sa salog aron dili kini musangit sa mga kable sa kuryente ug sa mga banderitas.
Matud ni Alparaque gidili ang paghatag o pag-itsa atol sa parade og mga election campaign materials, candies, paypay, kalo ug uban pang mga promotional nga materyales.
Sitahon ug papahawon usab sa mga awtoridad ang bisan kinsang musinggit og mga bastos nga linggwahe ug mga anti-government expressions.
Subling pasidaan ni Alparaque sa publiko nga bawal ang pagsuot og mga uniporme sa pulis, sundalo ug uban pang mga law enforcement units.
Aron dili madelatar atol sa mga checkpoints gipahimangno sa mga awtoridad nga dili nalang magdala og mga backpacks ug mga dagkong bagahe.
Samtang sumala ni City Transport and Traffic Management Office head Dionisio Abude nga ala-1:00 sa kadlawon ikasa na nila ang road clearing operations ug mubalik sa normal ang dagan sa trapiko alas-4:00 sa hapon karong Sabado.
Matud ni Abude nga ang ruta sa Parada magsumikad gikan sa Roxas Avenue ug matapos kini sa San Pedro St.
Mokabat sa 200 ka mga Traffic Enforcers ang ipakatag atol sa parada aron magpabiling hapsay ang kadalanan.
RadyoMaN Aimee Guinita
