Davao City – Mupahigayon og parallel investigation ang Regional Internal Affairs Service XI sa nahitabong disgrasya niadtong February 23, 2021 sa Compostela, Davao de Oro nga nisangpot sa kamatayon sa 3 ka mga pulis ug 2 ka mga backriders sa kabangga nga motor samtang duha ang samdan.
Gimanduan ni RIAS XI Regional Director PBGEN Jonas Ejoc ang Provincial IAS nga mulusad og parallel investigation aron maghatag og katin-awan sa insidente subay sa nitumaw nga alegasyong hubog ang mga pulis.
“Kung dili police operation dili na covered sa among jurisdiction. Pero pwedi mi mag-imbestiga kung ingon ana naay allegation nga hubog sila nga naga-drive pero dili kami ang lead agency ana sa investigation, parallel investigation ang among himuon,” sumala niini.
Giklaro ni Ejoc nga dili covered sa moto propio investigation o function sa IAS ang nahitabo tungod dili kini police operation nga adunay sibilyan nga namatay sa operasyon o adunay nakumitar nga violation sa rules of engagement o Human Rights Violation.
Magdepende karon ang RIAS XI sa imbestigasyon sa PRO XI tungod ilaha kining hurisdiksyon, pagpatin-aw ni Ejoc.
Giila ang mga namatay nga sila PCpl Aries Jay Eray nga nadestino sa Compostela Municipal Police Station, Patrolman Armon Rudila Pelicano ug Patrolman Adamson De Isidro Casador sakop sa Regional Mobile Force Batallion (RFMB) 11 samtang duha ka mga backriders sa motor nga sila magparyenteng sila Mabinse.
Samdan si PSSg Jayford Sumaliday, ang nagmaneho sa gisakyang Toyota Fortuner ug ang driver sa nakabangga nilang pula nga Motorstar motorcycle nga si Rodolfo Antiojo.
Sa imbestigasyon, ang gisakyang Toyota Fortuner sa mga pulis nga gimanehoan ni PSSG Sumaliday, gikan kini sa Brgy. San Miguel, Compostela, Davao de Oro padulong og Montevista, Davao de Oro apan nawad-an kini’g control ug ni-swerve sa wala nga direksyon ug nisalpok sa motor nga gisakyan usab sa tulo ka laing mga biktimang sibilyan.
RadyoMaN Aimee Guinita
