Davao City – Mas palabihon sa usa ka tag-iya og pribadong tulonghaan ang kaayohan, interes ug kaugmaon sa mga kabataan inay nga motutok diha sa kita kun ginansya gikan sa school operations sama pananglitan sa tuition fees nga ibayad sa mga estudyante.
Matud ni Parents Mobilization Action Group (PMAG) President ug school owner Febe Matthew, bahala’g wala siya’y kitaon karong tuiga sa iyang eskwelahan basta ang mga kabataan dili lamang maigo og COVID-19.
Segun ni Matthew,kung siya lamang ang pabut-on, mas maayong dili na lamang una magklase karong tuiga gani paabuton na lamang nga mahuman ang pandemic bahala’g dakung disbentaha kini kaniya isip usaka negosyante.
Apan kon mupadayon gayod ang DepEd sa pag-abli sa klase karong August 24, mas maayong ipaagi ang klase sa online ug dili sa naandang sistema sa pag-estudyo sa atong mga kaanakan.
Saysay pa ni Matthew, kini aron maprotektahan ug malikay ang mga estudyante ug ang mga magtutudlo maingon man ang mga ginikanan gikan sa makamatay nga balatian nga mibutho karon sa tibuok kalibutan.
Aminado ang school administrator nga ang online classes dili makahatag og igong kalidad sa edukasyon alang sa mga kabataan apan maayo na lamang kini kay sa wala gayu’y hikat-onan ang mga kabataan karong tuiga.
Dugang ni Matthew nga pwede usab nga ipaagi sa kahanginan pinaagi sa television ug sa mga estasyon sa radyo ang pagpanudlo bisan tuod og walay kasegurohan ang igong kalidad sa edukasyon nga mahatag ngadto sa mga estudyante.
Apan kon may igong collaboration ug pagtinabangay ang mga ginikanan ug ang mga magtutudlo, hayan anaa gihapon ang igo ug ensaktong edukasyon nga gikinahanglan sa atong mga tinun-an, panapos ni Matthew.
RadyoMaN Joel Viray
