Paabuton ni Cebu Archbishop Jose Palma nga mopasabot sa iyang kaugalingon si Fr. Lamberto “Jun” Paradiang, rector sa Don Bosco Youth Center sa brgy. Pasil, human sa gihimong pagsupak niini sa iyang mando sa pagdili sa mga pari nga mokuyog sa operasyon sa Oplan Tokhang.
Nasayran nga Martes sa miaging semana, si Fr. Paradiang mikuyog sa operasyon sa Oplan Tokhang uban sa kapulisan didto sa brgy. Suba ug Pasil, dakbayan sa Sugbo.
Kini taliwa sa gihimong pagdili ni Palma sa kaparian nga mosalmot sa maong operasyon, tungod kay alang sa arsobispo, dili kini kabahin sa proper domain sa church ministry.
Gawas niini, wa usab gikalipay sa arsobispo ang mga casualties sa tokhang operations sukad sa miaging tuig ug ang mga insidente sa extra-judicial killings, nga gibana-bana nga miabot na sa 7,000 ka mga tawo ang namatay sa maong mga operasyon.
Hinoon, gitataw ni Palma nga mas tutukan nila ang drug rehabilitation sa mga surrenderers inay mokuyog sa operasyon sa tokhang.
Andam hinoon ang arsobispo nga mohimo og dayalogo tali kang Fr. Paradiang, isip siya maoy labaw niini.
Gawas niini, nangayo usab si Palma ug tambag ngadto kang kanhi Chief Justice Hilario Davide Jr., labot na sa paglambigit sa kaparian sa Oplan Tokhang, apan gi-reaffirmed lang ni Davide ang iyang desisyon pagdili sa mga pari sa pagkuyog niini.
Dugang ni Palma nga magpabilin ang iyang desisyon ug iyang paabuton nga mopasabot si Fr. Paradiang sa pag-supak niini sa iyang kamanduan.
Facebook Comments
