Ginakabalak-an nga wala sang may ipadala nga atleta ang probinsya sang Iloilo sa Western Visayas Regional Athletics Association ukon WVRAA Meet 2019 sa Capiz sa maabot nga Pebrero 17 tubtob 23,2019.
Ini bangud wala sang otoridad si Governor Arthur Defensor nga pirmahan ang Memorandum of Agreement sa tunga sang provincial government kag sang Department of Education , Division of Iloilo agud ma-release ang 20 milyones pesos nga pondo bilang bulig sa mga atleta kag sa bilog nga delegasyon.
Suno kay Defensor, iya kanselahon ang partisipasyon sang probinsya sang Iloilo sa WVRAA 2019 kon wala sang pondo bangud magutuman lang ang bilog nga delegasyon.
Dugang pa niya nga mapreso siya kon sundon niya ang panugyan ni 3rd district Board Member Manny Gallar nga i-certify lang nga necessary ang gina-request nga pondo para sa mga atleta.
Ginahingyo karon ni Defensor ang Sangguniang Panlalawigan nga magpasar sang resolusyon nga nagahatag sa iya sang otoridad nga magpirma sang nasambit nga MOA.
Nahibaluan nga base sa Local Government Code of 1991, Sec 323, indi makatalakay sang iban nga topiko ang Sangguniang Panlalawigan kaangay sang pagpasar sang ginapangayo nga resolusyon sang gobernador tubtob indi matapos ang pagtalakay kag pag-apruba sa 2019 annual budget sang probinsya sang Iloilo.
