Nagpirma sang partnership agreement sang nakaligad nga biyernes ang Philhealth region 6 kag ang Medical City para sa Z-Benefit package para sa coronary bypass graft surgery.
Ang memorandum of agreement ginpirmahan nanday Philhealth Regional Vice-President Lourdfes Diocson; Dr. Bernadette Reynes, Chief sang Health Care Delivery Management Division sang Philhealth; Dr. Louie Tirador, head sang Cardiovascular program sang Medical City kag Dr. Jared Billena, chair sang Department of Pathology sang Medical City.
Ginpahayag ni Dr. Diocson nga ang makaalarma nga pagtaas sang death rate tuga sang cardiovascular disease ang nagtulod sa Philhealth agud mag-partner sa Medical City agud maghatag sang package para sa heart bypass.
Sa idalum sang Z benefit package for heart bypass, ang tagsa ka patient-beneficiary ang maka-agum sang 550,000 nga package para sa kabug-usan nga pagbulong.
Sakop sang package ang mga bulong, operating room kag professional fees sang mga doktor nga magapatigayon sang operasyon.
Lakip man sa igahatag sa pasyente ang mga serbisyo kaangay sang pre-operative laboratory tests, medications, blood support, open heart surgery kag continuing post-operative care.
Ang nasambit nga benefit package ang ikaduha sa pinakamataas nga benefit package nga ginabayaran sang Philhealth.
