Davao City – Nahanaw na ang kasagrado sa katuyuan sa dihang gipundar ang Party List System of Election sa nasud kansang oportunidad ug kahigayonan gitagana alang sa ‘marginalized, under represented sector’ human nahikaw kanila ang kahigayonan nga makatingog sa Kongreso.
Gihikawan og talagsaong pribilehiyo sa mga politiko nga hakog sa gahum ang mga kabus ug timawa nga makapalanog sa ilang mulo sa Kongreso nga mao unta’y tuyo sa party list system sa nasud.
Matud ni Mindanao Advocacy and Social Communications Managing Director Candido Aparece, daghan sa mga pulitiko nipahimulos sa party list system aron makasulod sa Kongreso.
Ang subo nga kamatooran mao nga ang Commission on Election daw buta sa kamatooran nga mga nominees wala maglangkub ug nagrepresenta sa tinuod nga ‘marginalized sector’ apan girekognisar ra gihapon.
Segun ni Aparece, wala gihapo’y pulos ang partyl ist kay ang prominenteng mga pulitiko ra gihapon ang naglipay sa kahigayonan nga makalingkod sa Kongreso imbes nga ang marginalized sector.
Pananglitan ang anak sa kanhi presidente ug karon House Speaker Gloria Arroyo nga si Mike Arroyo kinsa nagrepresenta sa mga sekyu ngadto sa Kongreso ug daghan pang uban.
Gi-capitalize sa ubang party list organizations ang sistema aron makakuha og lingkuranan sa Kongreso kansang katuyoan dili aron mutabang sa mga kabus apan gub-on ang gobyerno ug ang demokrasya sama na lamang sa party list groups ubos sa landong sa Makabayan bloc.
Sanglit wala na ma’y kasagrado ang talagsaong oportunidad diha sa proportional representation scheme, mas maayong undangon na lamang kini kaysa padayon kining pasipad-an sa mga traditional politicians kun ‘trapos,’ ruling elite ingon man mga oligarch, dugang ni Aparece.
RadyoMaN Joel Viray
