TACLOBAN CITY – Patay an usa nga pasahero matapos mabunggo an ginsasakyan nga multicab ha katapo nga motorsiklo ha Brgy. Cabalawan, Tacloban City kasangkulop, June 10.
Subay han report tikang ha Police Regional Office 8, ginkilala an an namatay nga lalaki nga hi Mateo Versoza, residente han Brgy. 48-B Esperas Avenue, Tacloban City.
Ginkilala naman an driver han passenger multicab nga hi Jimmy Lego, 38 anyos, may asawa, residente ha Brgy. Suhi, Tacloban City.
Ginkilala naman an driver han motorsiklo nga hi Jessie Simborio, 18 anyos, residente ha Brgy. Amandayehan, Basey, Samar.
Nagawas ha inisyal nga imbistigasyon han mga otoridad, tikadto ha Tacloban proper an multicab samtang tigawas naman ha Tacloban proper an motorsiklo pero nag-encroach an motorsiklo ha usa nga lane rason nga nakatapo niya an multicab.
Nadara pa ha hospital an pasahero han multicab pero gindeklara ini nga dead on arrival.
Samtang, samaran naman an mga driver han pareho nga sarakyan ngan nagpapatambal ha ECRMC.
