General Santos City–Gikinahanglan na matud pa mag fill-up ug form nga ihatag sa mga Airline Company ang tanang mga pasahero nga muabot sa Gensan International Airport mao kini ang nahimong pagbutyag ni Caap Manager Edgardo Cueto.
Sumala pa ni Cueto nga human ang maka alarmang kaso sa COVID 19 sa kauluhan gilayon niini nga gipulong ang mga manager sa mga Airline Company nga nagatugpahan sa Gensan aron ipahibalo ang aksyon nga ilang himuon isip pagpangandam batok COVID 19.
Apil sa mga mitambong sa gihimong pulong ang mga Health Official gikan sa Gensan ug Sarangani Province kung asa nasabutan matud pa nga ayha makatugpa ang eroplano, gikinahanglan mag fill-up ang mga pasahero ug form kabahin na sa ilahang travel history ug status sa ilang panglawas aron masayran gilayon sa mga health officer kung asa gikan ang mga pasahero ug masayran kung kinsa ang kinahanglan nga ibutang sa quarantine period.
Kolektahon matud pa kini sa mga flight attendant ug ihatag sa mga health officer nga nakabase sa Gensan Airport. Pinaagi matud pa niini mas dali ang pag trace sa mga health officer sa mga pasahero ugaling pipila ka adlaw human sila miabot sa GenSan international airport migawas ang sintomas sa COVID 19.
Nanghinaot nalang si Cueto nga mamahimong honest ang mga pasahero sa pagbutang ug impormasyon sa form bahin sa sitwasyon sa ilang panglawas ingon man sa ilang travel history.
Samtang dakong tabang usab sa mga health worker ang checklist sa mga pasahero nga motugpa sa Gensan International Airport. Pinaagi niini maidentify gilayon sa mga health workers ang mga pasaherong ipailaom sa Patient Under Monitoring o Patient Under Investigation.
Sumala pa ni Dr. Alvin Alejandro ang labaw sa Provincial Health Office -Sarangani pinaagi sa moang mga impormasyon mas dali alang kanila ang pag trace sa mga pasahero nga adunay history sa travel sa mga lugar nga infected sa COVID 19.
Samtang mapasalamaton man usab si Dr. Alejandro sa Manager sa duha ka mga airlines nga naa sa Gensan Airport tungod sa pag-uyon nila sa nahimong protocol kabahin na sa mga pasahero nga gikan sa mga lugar nga infected sa covid 19.
Kampante usab ang duha ka mga OFW nga pasahero nga gikan sa middle east nga mitugpa sa Gensan gikan sa NAIA sa ginahimong precautionary measures sa NAIA ug Gensan International Airport.
Sumala pa nilang Iris ug Aisa nga hugot ang ginahimong pagmonitor sa mga airport nga ilang naagian kung asa usa-usa matud pa nga mopailawom sa Thermal Scanning ang mga musulod nga mga pasahero ug matag lugar matud pa sa Airport gikan sa pagsulod ngadto na sa pagsaka sa eroplano, ginasanitize gyud sila aron nga makasiguro nga dili malutsan sa COVID 19.(Dave Silagan)
