Davao City – Gipusil ang usa ka 20 anyos nga lalaki samtang nag sakay kini og habal-habal alas 8:24 sa kagabhion sa may Purok 1 Rizal, Barangay Canocotan Tagum City, Davao del Norte.
Sa record sa PRO XI, ang biktima naila sa pangalang Jhon Carl Gudo, 20 anyos nga taga Purok Waluhan Mirafuentes, Barangay North Tagum City samtang ang suspek mao sila si Jeric Puraso sa Barangay Luoban Pantukan Comval, alyas Gaga ug laing duha ka mga suspek nga wala pa mailhan.
Matod pa, nagsakay og motor si Gudo apan pag abot niini sa may ngitngit nga bahin sa naasoy nga lugar kalit kining gipusil sa usa sa mga suspek hinungdan sa pagkahulog sa motor sa canal diin daling nakasibat ang driver sa habal-habal.
Si Gudo nakahiagom og pinusilan sa iyang kalawasan ug sa may ulo nga bahin niini diin anaa kini sa krikitikal nga kahimtang sa karon.
Subay sa imbestigasyon, personal nga bangi ang posibleng hinungdan sa pagpusil sa biktima.
Padayong nagpaalim sa balay tambalanan ang biktima samtang naglusad na og pursuit operation ang kapulisan sa Tagum alang sa pagsikop sa mga suspek.
RadyoMaN Abi Bibera
