Mokabat sa 86 ka mga pasahero ang na stranded karon sa duha ka mga pantalan sa Surigao City, 45 sa Macapagal Terminal sa Bilang-bilang ug 41 ka mga pasaherong nastranded sa Lipata port diin ang pipila sa maong mga pasahero ang padulong unta sa Liloan ug Benit, San Ricardo Southern Leyte.
Sigun sa Phil. Coast Guard, gawas sa mga pasaherong nastranded lima ka mga barko usab ang nastranded dungan sa pagklaro nga kanselado ang biyahe sa tanang mga sakyanang pandagat karong mga panahona.
Nadugangan ang ihap sa mga lugar nga nagsuspende sa klase karong adlawa dire sa Caraga Region tungod sa pag-atake ni Bagyong Basyang.
Nasayran nga karong hapon nagdeklara ug suspension sa klase gikan sa Pre-school hangtud na sa High school ang local nga panggamhanan sa Butuan City ug Surigao del Sur.
Madumduman nga una nang nadeklara ug class suspension gikan sa pre-school ug elementarya ang Probinsya sa Agusan del Norte , Dinagat Islands ug Surigao del Norte.
Sa ulahing update alas onse kaganina gipailalom sa Signal Number 2 na sa maong bagyong ang Surigao del Sur samtang pabilin sa signal number 1 ang Dinagat Islands, Surigao del Norte, Agusan del Norte, Agusan del Sur, Camiguin, Compostela Valley, Davao Oriental, Davao del Norte, Misamis Oriental, Misamis Occidental, Lanao del Norte, Lanao del Sur, Bukidnon ug uban pang lugar.
