Davao City – Sa maka-usa pa, subli na usab nga gibuksan sa dakbayan sa Davao ang usa sa pinaka-mabulokon niini nga tinuig nga selebrasyon: Ang kasumaran sa kamugnaan niining progresibong syudad sa Mindanao ug sa entero nasud karon.
Pinaagi sa mga pinasahing aktibidades ug mga kalingawan, pormal nga gi-ablihan sa City Government ang ika-82nd Araw ng Davao Founding Anniversary uban mismo si Mayor Inday Sara Duterte-Carpio kinsa maoy personal nga nanguna sa ‘Pasiugdang Pagsaulog’ kun opening sa selebrasyon karong tuiga.
Atol sa maong opening event, nidagsa ang katawhan sa Rizal Park aron saksihan ang pormal nga pagbukas sa dakung aktibidad.
Atol sa speech ni Mayor Inday Sara, gipasidunggan niini ang mga Davaoeños nga maoy dakung rason kung nganong importanteng saulugon nato ang Araw ng Davao.
“Kinahanglan nato i-celebrate ni kay ang Araw ng Davao, Araw ng Dabawenyo and so we celebrate it every year in recognition of the hard work, sacrifices, the successes and triumphs of the Dabawenyos. Ang atong gina recognize dili lamang ang mga talented nga Dabawenyos nga garbo natong tanan like our dance and singing group and our candidates here tonight apan ang yanong Dabawenyo nga nagapaningkamot taga adlaw”.
Gipresenta usab ngadto sa publiko ang mga kandidato og kandidata sa tulo ka mga major pageants ug highlight events nga labing gi-atangan sa tanan karong tuiga.
Usa-usa nga nagpaila-ila sa publiko ang 15 ka mga kandidato sa ‘Ginoong Davao 2019’ ingon man ang 30 ka mga kandidata sa ‘Reyna Davaoeña’ kinsa mga representante sa LGBT community uban usab ang 15 ka mga maanyag nga kandidata sa ‘Mutya ng Davao 2019.’
Sa iyang giluwatang pamahayag, gibutyag sa alkalde nga buot niini nga adunay mga Ambassador ug Ambassadress ang kalalakin-an, kababayen-an ingon man ang sektor sa LGBT community sa Davao aron paghatag ug katumanan sa damgo sa gay community nga mahatagan sila sa gitawag nga ‘equality’ subay sa prinsipyong ‘social inclusion.’
RadyoMaN Aimee Guinita
