Davao City – Apektado ang preparasyon sa katawhan sa selebrasyon sa Pasko nga mahitabo na sa sunod semana human kasagaran kanila, wala na’y balay kapuy-an human giguba sa nakalabay nga mga pagtay-og gikan sa bulan sa October hangtud karong bulana.
Matud ni Magsaysay Municipal Information Officer Anthony Allada, aduna na unta’y nangandam alang sa pagsugat sa Pasko apan tungod sa subli nga mga paglinog, napakgang ang ilang tinuig nga pag-prepara sa selebrasyon.
Mao kini ang unang higayon nga dili sa kaugalingong panimalay inay diha sa mga evacuation centers ang pagsugat sa katawhan sa Pasko nga napuno og pagsulay, kaguol ug kalisang hatod sa nahitabong mga paglinog nga miigo sa maong lungsod.
Segun ni Allado, walay rason aron i-selebar sa katawhan ang Pasko karong tuiga sanglit karong tuiga mao man ang makunsidera nga labing mapait sanglit bisan pagpalit og pang-Noche Buena, wala gayod sila’y magasto gumikan sa mga kalamidad nga mihampak sa ilang lugar.
Gani, kamatooran niini, nawad-an og excitement ang katawhan sa pagsugat sa Pasko gani mikunhod ang mga miadto sa mga simbahan sukwahi sa mga nanglabay nga mga Simbang Gabi nga magdasok diha sa mga kasimbahanan, sumala ni Allada.
Mas gipili sa mga empleyado ug sa mga opisyales sa lokal nga kagamhanan nga dili na lamang magpahigayon og selebrasyon sa Pasko kun Christmas Party aron ipakita ang ilang simpatiya ngadto sa mga residenteng gibati og tumang kaguol tungod sa mga panghitabo.
Malaumon si Allada nga makabangon ra sa gihapon ang ilang katawhan gikan sa mapait nga mga pagsulay nga gibilin sa mga linog diin gikuptan niini ang panultihon nga ‘samtang may kinabuhi pa, may paglaum pang nahibilin’ kanilang tanang mga biktima sa katalagman.
RadyoMan Joel Viray
